Lenti í mikilli ókyrrð - farþegum boðin áfallahjálp

Flugvél Flugfélags Íslands sem var á leið frá Ísafirði, eftir að hafa hætt við lendingu þar, lenti í mikilli ókyrrð þegar flogið var uppúr Skutulsfirðinum. Farþegum var boðin áfallahjálp þegar vélin lenti á Reykjavíkurflugvelli.

Flugvélin fór af stað frá Reykjavík klukkan korter yfir tíu í morgun með 23 farþega um borð ásamt þriggja manna áhöfn. Í aðflugi inn á Ísafjarðarflugvöll var ákveðið að hætta við lendingu vegna nokkurrar ókyrrðar, þegar vélin hinsvegar flaug frá Ísafjarðarflugvelli lenti hún í mikilli ókyrrð. Frá þessu er greint á heimasíðu Flugfélags Íslands.

Vélinni var flogið til Reykjavíkur þar sem lent var klukkan rúmlega tíu mínútur í tólf. Við komuna þar fór áhöfn vélarinnar ítarlega yfir flugið með farþegum vélarinnar og útskýrði hvað hafði gerst. Þar var farþegum jafnframt boðin áfallahjálp.