Samanlagðir dómar brotamanna námu 334 árum

Óskilorðsbundnar fangelsisrefsingar sem dæmdar voru hjá dómstólum landsins á síðasta ári og sendar voru Fangelsismálastofnun til fullnustu eru samtals 334 ára fangelsisvist.

„Þetta er hæsta tala sem við höfum séð í þessum efnum,“ segir Páll E. Winkel, forstjóri Fangelsismálastofnunar. „Síðasta met var árið 2007. Á því ári nam heildarrefsitíminn 300 árum.“

Páll segir þessa þróun á lengd heildarrefsitíma í samræmi við það sem fangelsisyfirvöld hafi verið búin að áætla og gera jafnframt grein fyrir í þarfagreiningu um framtíðaruppbyggingu í fangelsismálum.

í dag eru 283 dómþolar á biðlista með 363 dóma alls. Refsitími þeirra er samtals 142,8 ár. Síðustu ár hafa verið í kringum 240 á biðlista.

Spurður um framtíðarsýn í þessum efnum segir Páll að gera megi ráð fyrir að dómþolum fjölgi og refsingar haldi áfram að þyngjast, ekki síst vegna fjölda gæsluvarðhaldsfanga eins og dæmin sanni nú.

„Opnun á bráðabirgðafangelsi að Bitru hjálpar upp á þetta ástand tímabundið,“ útskýrir Páll.

„Þar verða allt að tuttugu pláss, sem komast í gagnið eftir mánuð eða svo. Áætlað er að hluti þeirra plássa, að minnsta kosti fimm þeirra, verði notuð fyrir afplánun sekta. Í næsta mánuði, þegar Bitra verður opnuð, verða menn, sem ekki hafa greitt sektir, boðaðir í afplánun, sem nánast hefur ekki verið gert að neinu leyti í nokkur ár vegna plássleysis. Það verður að grípa inn í þennan þátt líka, því sektir fyrnast að öðrum kosti. Meginmarkmiðið er að menn greiði sektir sínar og svo vill til að hafi þeir fengið boðun í Hegningarhúsið á ákveðnum degi, á ákveðnum tíma, þá greiða margir þeirra það sem þeim ber.“

Páll segir að í fjárlög þessa árs hafi verið sett inn heimild til að selja Hegningarhúsið og Kópavogsfangelsið og leita að hentugra húsnæði undir gæsluvarðhaldsfangelsi.

„Ef af þessu verður er þetta fyrsta skrefið í þá átt að nýtt gæsluvarðhaldsfangelsi verði tekið í notkun í Reykjavík. Sparnaður fyrir lögreglu og fangelsismálakerfið yrði mikill auk þess sem gæsluvarðhaldsklefar á Litla-Hrauni yrðu líka notaðir sem afplánunarklefar.“

jss@frettbladid.is