Herjólfur þurfti aðstoð í aftakaveðri - myndir

Herjólfur kom til Vestmannaeyja klukkutíma of seint í dag en vindhraði var svo mikill að kalla þurfti lóðsinn til aðstoðar. Herjólfur átti í mestu vandræðum með að leggjast að bryggju en samkvæmt fréttaritara fréttastofunnar, Gísla Óskarssyni, var vindurinn slíkur að lóðsinn þurfti til þess að leggja Herjólfi.

Þetta mun vera afar sjaldgæft að kalla þurfi lóðsinn til þess að aðstoða Herjólf.

Veður er verulega vont í Vestmannaeyjum og björgunarsveitin er í viðbragðsstöðu. Eitthvað lauslegt hefur fokið um bæinn, meðal annars krossviðarplötur. Þá losnuðu þakplötur á húsi en fljótlega gekk að gera við þakið.

Að sögn Gísla hefur enginn bátur slitnað upp þrátt fyrir aftakaveður.

Öll fiskveiðiskip er komin til hafnar vegna fundar sem verður haldinn í Vestmannaeyjum í kvöld um kvótamálin. Mest hefur vindur farið upp í 50 metra á sekúndu á Stórhöfða í dag.