Sakar minnihlutann um að taka undir ávítta gagnrýni Ólafs F.

Borgarfulltrúi Sjálfstæðisflokksins, Þorbjörg Helga Vigfúsdóttir, sakar minnihluta borgarstjórnar, Samfylkinguna og VG, um að taka óbeint undir málflutning borgarfulltrúans Ólafs F. Magnússonar, með því að sitja hjá þegar vantrauststillögu Ólafs var vísað frá á borgarstjórnarfundi í vikunni.

Orðrétt skrifar Þorbjörg á blogg sitt sem finna má á Eyjan.is: „Minnihluti borgarstjórnar ákvað hins vegar að sitja hjá við afgreiðslu frávísunartillögunnar. Með því tók minnihlutinn óbeint undir ómálefnalegan rógburð Ólafs og datt þar með ofan í sama forarpytt."

Eins og kunnugt er þá var Ólafur ávíttur fyrir níðvísu um Hönnu Birnu Kristjánsdóttur, borgarstjóra, sem hann flutti ásamt vantrauststillögu á hennar hendur og sakaði hana meðal annars um spillingu.

Þegar tillögunni var vísað frá sátu borgarfulltrúar VG og Samfylkingarinnar hjá og vill Þorbjörg meina að þar með hafi þeir tekið undir þær sakir sem bornar voru á borgarstjórann í tillögunni.

Og Þorbjörg skrifar: „Það að sitja hjá felur nefnilega í sér þegandi samþykki yfir vinnubrögðum Ólafs."

Hún fullyrðir svo að sjálf hefði hún stutt tillögu um frávísun ef spjótin hefðu staðið á einhverjum úr minnihlutanum. Um hjásetu borgarfulltrúa segir Þorbjörg svo: „Eina orðið sem mér kemur í hug yfir slík vinnubrögð minnihlutans er skömm."

Færsluna má lesa hér.