Samninganefndin á byrjunarreit

„Vinna samninganefndarinnar er á byrjunarstigi ef svo má segja. Bæði aðal samninganefndin og einstakir samningahópar hafa verið að undirbúa sig og viða að sér upplýsingum," segir Árni Þór Sigurðsson, formaður starfshóps utanríkismálanefndar um Evrópumál. Starfshópurinn fundaði í dag með forystumönnum samninganefndar Íslands vegna fyrirhugaðra aðildarviðræðna við Evrópusambandið.

Starfshópur utanríkismálanefndar er skipaður fimm þingmönnum allra flokka. Árni segir hópurinn hafi fundað alloft frá því að hann var skipaðu í júlí á síðasta ári. „Við höfum verið að fara yfir hugsanleg álitamál og annað slíkt en það er ekki komið að neinum ákvörðunum."

Hópnum er ætlað að funda reglubundið með utanríkisráðherra og íslensku samninganefndinni. Á fund starfshópsins í dag komu Stefán Haukur Jóhannesson, formaður samninganefndarinnar, og varaformenn nefndarinnar þau Björg Thorarensen og Þorsteinn Gunnarsson.

Árni segir að samninganefndin vinni faglega og að sér sýnist sem sem nefndinni gangi vel í störfum sínum. Forystumenn nefndarinnar hafi fundað með hagsmunaaðilum og nú standi yfir undirbúningsvinna.

„Það er ekki farið að vinna neina efnislega vinnu ennþá eins og til að mynda afstöðu í einstökum málaflokkum," segir Árni.