Flotinn á leið á mótmælafund

Útgerðarmenn í Vestmannaeyjum hafa stefnt flota Eyjamanna til hafnar svo sjómenn geti tekið þátt í baráttufundi gegn fyrirhuguðum aðgerðum stjórnvalda í málefnum sjávarútvegsins sem haldinn verður í samkomuhúsinu Höllinni í kvöld.

Fundurinn, sem ber yfirskriftina Fyrnum fyrningarleiðina, er hugsaður sem mótmælafundur gegn fyrningarleið í sjávarútvegi, útflutningsálagi og afnámi sjómannaafsláttar. Þar á að sýna stjórnvöldum hver hugur Vestmannaeyinga er til fyrirhugaðra breytinga í greininni og rökstyðja hvaða neikvæðu áhrif þær hafa á samfélög sem byggja allt sitt á sjávarútvegi.

Fundarboðendur eru Sjómannafélagið Jötunn, Skipstjóra- og stýrimannafélagið Verðandi, Félag vélstjóra- og málmtæknimanna, Godthaab í Nöf, Útvegsbændafélag Vestmannaeyja, Útvegsbændafélagið Heimaey og Vestmannaeyjabær.

Elliði Vignisson bæjarstjóri segir að bæjarstjórn Vestmannaeyja hafi ályktað gegn fyrningarleið í sjávarútvegi og talið hana jafngilda aðför að atvinnulífi Vestmannaeyja og þar með byggð í Eyjum.

„Vestmannaeyjabær tekur þátt í baráttufundinum vegna þess að samfélagið í Eyjum stendur eða fellur með sjávarútveginum. Allir íbúar eiga í raun allt sitt undir því hvernig þessari atvinnugrein og fyrirtækjum í henni vegnar. Við ætlum ekki að horfa þegjandi og aðgerðarlaus á velferð okkar skerta á þann máta sem nú er boðað.“ - shá