Tíu rússneskir njósnarar handteknir í Bandaríkjunum

Bandaríkjamenn handtóku í dag tíu einstaklinga grunaða um að vera rússneskir njósnarar. Einn gengur enn laus. Ákærur á hendur njósnurunum hljóma líkt og reyfari frá Kalda stríðs árunum en fólkið hafði búið í Bandaríkjunum í um 20 ár og hafði það markmið að koma sér fyrir í mikilvægum stöðum í stjórnkerfinu.

Í ákærunum á hendur fólkinu kemur fram að einhverjir rússnesku njósnarana áttu að búa saman sem hjón og áttu jafnvel börn til að auka á blekkinguna. Líkt og í góðum njósnamyndum þá liggja fyrir myndir af njósnurunum að skiptast á töskum á fjölförnum stöðum, bréf skrifuð á dulmáli og með ósýnilegu bleki og peningar faldir, grafnir á víðavangi, svo árum skiptir.

Njósnararnir eru taldir vera á vegum S.V.R sem er nafnið á rússnesku leyniþjónustunni eftir að KGB leið undir lok með falli Sovétríkjanna.

Rannsóknin á hendur njósnurunum stóð yfir í mörg ár. Talið er að njósnararnir hafi verið þjálfaðir í Moskvu og þeir svo sendir til Bandaríkjanna upp úr 1990. Þeir eru ákærðir fyrir njósnir og samsæri gegn Bandaríkjunum en við því eru þung viðurlög - allt að 20 ára fangelsisvist.

Í umfjöllun erlendra fjölmiðla um málið kemur fram að það geti haft áhrif á samskipti Bandaríkjanna og Rússlands. Stutt er síðan Barack Obama, forseti Bandaríkjanna, og Dimitry Medvedev, forseti Rússlands, hittust og ræddu um bætt samskipti ríkjanna tveggja. Andinn á fundi þeirra var svo góður að þeir skelltu sér á hamborgastað og gæddu sér á borgara og frönskum.

Þá grunaði kannski fáum að enn væru rússneskir njósnarar á bandarískri grund.