Veitingamenn vilja áfengisverslun burt úr miðbænum

Margir eigendur veitingastaða og kaffihúsa í kringum Austurvöll og víðar í miðbænum eru á móti staðsetningu ÁTVR við Austurstræti. Eru þeir sammála um að neysla Íslendinga á áfengi aukist til muna þegar veður er gott og sólin skín, en finna fyrir mikilli samkeppni við ÁTVR og segja að það verði æ algengara að fólk kaupi sér þar bjór eða léttvín og setjist með það beint á grasið á Austurvelli.

„Þetta er mjög mikil samkeppni,“ segir Tómas Kristjánsson, eigandi Íslenska barsins. „Þegar sólin skín vilja allir vera á Austurvelli með öl í bauk.“

Valdimar Hilmarsson, eigandi Hressingarskálans, segir að staðsetning ÁTVR dragi að sér ógæfufólk og vill láta færa staðsetningu búðarinnar.

„Það er ekki spennandi fyrir ferðamenn sem sækja miðbæinn að sjá svona mikið af ógæfufólki í kringum sig,“ segir hann. „Fyrir utan að vera mikil samkeppni við veitingastaði á svæðinu.“

Einn eigenda Thorvaldsen bars, Valdís Arnardóttir, og Óli Már Ólason, annar eigandi Vegamóta og Austur, taka í sama streng og Valdimar og segjast finna fyrir mikilli samkeppni við ÁTVR við Austurstræti. Þau telja að staðsetningin eigi að vera færð lengra frá veitingahúsum. Þó finnst þeim Íslendingar alla jafna vera duglegir við að setjast niður á veitingastaði og fá sér drykk þegar veðrið er gott.

Arnór Bohic, einn af eigendum Hvítu perlunnar og Café París við Austurvöll, er sammála því að áfengisneysla aukist þegar veður er gott. „Íslendingum finnst ekki leiðinlegt að drekka,“ segir hann. „Austurvöllur er miðpunktur borgarinnar og það er frábær stemning sem getur myndast þar þegar allt þetta fólk kemur saman og getur skipt þúsundum.“

Arnór er ósammála því að flytja eigi ÁTVR úr Austurstræti.

„Það ættu að vera fleiri búðir og lengri afgreiðslutími,“ segir hann. „Það er alveg nógu mikið að gera hjá okkur og ÁTVR er þjónusta sem er nauðsynleg á þessum stað.“ Varðandi umgang ógæfufólks í kringum búðina segir Arnór að staðsetningin sé ekki vandamálið. „Borgaryfirvöld eru ekki að sinna þessu fólki eða eru með nein sýnileg plön um það hvernig á að meðhöndla það,“ segir Arnór. sunna@frettabladid.is