Endurupptaka þjóðlendumála verði heimiluð

Landssamtök landeigenda á Íslandi skora á Alþingi og ríkisstjórn að breyta lögum um þjóðlendur þannig að þar verði sett inn ótímabundið heimildarákvæði um endurupptöku mála komi fram ný sönnunargögn í þjóðlendumálum sem lokið er með dómum. Þetta kemur fram í tilkynningu frá samtökunum en þetta var samþykkt samhljóða á aðalfundi þeirra í Reykjavík á fimmtudaginn var.

„Vísað er til þess að um 16.000 skjöl liggi órannsökuð í Árnastofnun og á Landsbókasafni og þar kunni að vera sönnunargögn um eignarhald á landi sem dæmd hafi verið þjóðlenda. Ekkert ákvæði sé í þjóðlendulögum sem heimili endurupptöku mála ef slík sönnunargögn komi í leitirnar.

Fram kom í skýrslu stjórnar á aðalfundinum að Óbyggðanefnd hefði eingöngu leitað til Þjóðskjalasafnsins eftir gögnum í þjóðlendumálum, aldrei til Árnastofnunar," segir ennfremur.

Örn Bergsson, formaður Landssamtaka landeigenda, segir ekki boðlegt að hafa það tilviljunum háð hvort fólk héldi helgum rétti sínum, eignaréttinum. Þess vegna krefðust samtökin þess að öll skjöl væru tiltæk og aðgengileg lögmönnum landeigenda. „Þorsteinn Magnússon, lögmaður í fjármálaráðuneytinu, mætti á aðalfundinn í forföllum Steingríms J. Sigfússonar fjármálaráðherra. Hann sagði að þegar hefðu verið kveðnir upp 45 héraðsdómar vegna þjóðlendumála og 31 Hæstaréttardómur. Tugir mála til viðbótar væru nú fyrir dómstólum, 33 mál fyrir héraðsdómstólum og 12 mál hjá Hæstarétti," segir einnig.

Þá er bent á að liðlega hálft landið hafi nú verið tekið til meðferðar í Óbyggðanefnd vegna þjóðlendumála. „Fjármálaráðherra hefur lýst yfir að ríkið muni ekki birta næstu kröfugerð sína fyrr en árið 2012. Formaður Landssamtaka landeigenda segir að með sama áframhaldi verði þjóðlenduyfirferðinni ekki lokið á landinu öllu fyrr en eftir 10-12 ár!," segir að auki.

Andstaða við breytingu á jarða- og ábúðarlögum

Á aðalfundinum bar fleira á góma en þjóðlendumál að því er fram kemur í tilkynningunni. „Þannig beindu landeigendur spjótum sínum að stjórnvöldum vegna áforma um endurskoðun jarða- og ábúðarlaga. Landbúnaðarráðherra skipaði starfshóp vegna þessa sumarið 2009 og kaus þá að sniðganga landeigendur. Landssamtök landeigenda telja einsýnt að fyrir stjórnvöldum vaki að setja skorður við viðskipti með jarðir og hverfa þannig til fortíðar með tilheyrandi afleiðingum: verðfalli, rýrari veðhæfni og söluerfiðleikum. Landeigendur leggjast því eindregið gegn breytingum á lögunum og telja að „ríkisstjórnar Ísland bíði önnur og brýnni verkefni en að blása meiri eld að eignarbrunanum sem á sér stað í sveitum landsins," eins og formaður samtakanna orðaði það á aðalfundinum."