McDonald leggur flautuna á hilluna

Dougie McDonald er hættur að dæma í Skotlandi en atvik sem kom upp í leik sem hann dæmdi fyrr í haust átti stóran þátt í því að dómarar ákváðu að fara í verkfall nú um helgina.

Skoskir dómarar dæmdu enga leiki um helgina og voru því fengnir dómarar frá Ísrael, Möltu og Lúxemborg til að dæma leikina í skosku úrvalsdeildinni. Fresta þurfti þó einhverjum þeirra vegna veðurs.

McDonald var mikið gagnrýndur vegna atviks sem átti sér stað í leik Celtic og Dundee United. McDonald hafði dæmt vítaspyrnu Celtic í hag en hann dró svo dóminn til baka.

McDonald gerði illt verra með því að ljúga til um málsatvik í leikskýrslu sinni. Hann sagði að aðstoðardómari hans, Steven Craven, hefði ráðlagt honum að draga dóminn til baka en það var rangt.

Raunin var sú að hann gerði sér fyllilega grein fyrir því sjálfur að dómurinn var rangur og það fékk hann svo staðfest hjá Craven. Aðstoðardómarinn hafi því engin áhrif haft á ákvörðun McDonald.

Neil Lennon, stjóri Celtic, fór fram á afsögn McDonald á sínum tíma en dómarar fengu nóg og boðuðu til verkfalls. Þó ekki eingöngu vegna þessa máls heldur kvörtuðu margir dómarar undan þeirri meðferð sem þeir hafa mátt þola undanfarnar vikur og mánuði vegna starfa sinna á vellinum. Sumir hafa þar að auki fengið líflátshótanir frá stuðningsmönnum.

En nú segir McDonald að hann vilji gefa öðrum dómurum svigrúm til að sinna sínu starfi og bætir við að með afsögn sinni sé áðurnefnt mál úr sögunni.