Um 8.000 tonn komin á land

Tvö þúsund tonnum af gulldeplu var landað á Akranesi í síðustu viku. Eftir brælu undanfarna daga héldu skip HB Granda á ný til gulldepluveiða í fyrrakvöld.

Um átta þúsund tonn af þessum örsmáa uppsjávarfiski hafa borist til vinnslu í fiskimjölsverksmiðju HB Granda á Skaganum frá því í byrjun desember.

„Vinnslan gengur orðið mjög vel,“ er haft eftir Guðmundi Hannessyni verksmiðjustjóra á heimasíðu HB Granda. „Nú vonum við bara að aflabrögðin glæðist. Ef það gerist þá verður okkur ekkert að vanbúnaði við að setja kraft í vinnsluna.“ - pg