Norðurlöndin veiti Íslandi tafarlaust lán

Systurflokkar Vinstri grænna í Norðurlandaráði hvetja ríkisstjórnir norrænu ríkjanna til að greiða nú þegar út þau lán sem búið var að samþykkja að veita Íslendingum, og bíða ekki eftir að deilan við Hollendinga og Breta leysist. Málið var rætt á fundi VG og systurflokkanna á janúarfundi Norðurlandaráðs í Kaupmannahöfn í gær.

„Flokkahópur vinstri-grænna (VSG) telur að Norðurlöndin verði að hjálpa Íslendingum að fá réttláta meðferð og raunsæjan samning. VSG leggur til að gerður verði samningur sem ekki grafi á neinn hátt undan íslensku þjóðfélagi," segir í tilkynningu.

Þar segir að Icesave samningurinn hafi oft verið ræddur á norrænum vettvangi og í flokkahópi VSG. „Eftir að forseti Íslands vísaði Icesave-samningnum til þjóðaratkvæðagreiðslu, eru Íslendingar í nýrri stöðu. Þeir hafa alltaf sagst myndu standa við skuldbindingar sínar. Umræðan snýst í fyrsta lagi um hvaða skuldbindinga er um að ræða og í öðru lagi á hvaða kjörum verður staðið við þær."

Þá segir í tilkynningunni að Íslendingar hafi ekki fengið tækifæri til að fá dómsúrskurð um hvernig innstæðutryggingakerfið á EES-svæðinu eigi að virka við algjört bankahrun í einu aðildarríkjanna.