Íslendingar gera allt vitlaust í Danmörku

Íslendingafélagið í Árósum ætlar að halda þorrablót 6. febrúar næstkomandi. Af því tilefni hafði Vísir samband við Hrafnhildi Þorleifsdóttur einn af skipuleggjendum fagnaðarins en hún er búsett í Árósum.

„Þessi skemmtilegi siður sem fylgir þorra er árlegur viðburður hjá Íslendingafélögum hér í Danmörku," segir Hrafnhildur og heldur áfram:

„Í ár fáum við frábæra hljómsveit, Sálina hans Jóns míns, til að koma og spila á dansleik hjá okkur á þorrablótinu sem er ekta íslenskt ball og leikkonan Bryndís Ásmundsdóttir verður veislustjóri hjá okkur."

„Nú þegar er orðinn mikill áhugi fyrir Þorrablótinu. Fólk allsstaðar að í Danmörku er búið að tryggja sér miða á blótið."

„Einnig er fólk frá Noregi, Svíþjóð og líka fólk frá Íslandi að koma og fagna með okkur þorra. Þannig að við erum full eftirvæntingar og eigum örugglega eftir að eiga skemmtilegt kvöld hér í Árósum."

„Við verðum að sjálfsögðu með ekta íslenskan þorra mat. Á hlaðborðinu verður eðal þorramatur sem er bæði súr og ósúr, rófustöppu, harðfisk, hákarl, hangikjét og uppstúf, rúgbrauð, flatbrauð með sméri og glóðasteikt íslenskt lambalæri með öllu tilheyrandi," útlistar hún.

„Nú er tækifærið fyrir alla Íslendinga í Danmörku að hittast og halda upp á þennan skemmtilega sið með einni af vinsælustu hljómsveit Íslands," segir Hrafnhildur að lokum.