Heilsutengd starfsemi í gömlu Heilsuverndarstöðinni

Allt bendir til þess að gamla Heilsuverndarstöðin við Barónsstíg muni aftur hýsa heilsutengda starfssemi en viðræður þessa efnis standa nú yfir milli eigenda hússins og heilbrigðisyfirvalda.

Til stóð að breyta að breyta gömlu Heilsuverndarstöðinni við Barónsstíg í hótel og var skipulagsráð Reykjavíkurborgar búið að gefa grænt ljós á framkvæmdina. Breytingarnar voru nokkuð umdeildar og hefur nú verið fallið frá þessari hugmynd.

Nú stendur til að leigja húsið undir starfsemi Landlæknis og Lýðheilsustöðvar en sameina á þessar tvær stofnanir um næstu áramót. Heilbrigðisráðuneytið auglýsti eftir húsnæði í vor og barst meðal annars tilboð frá eigendum hússins.

Viðræður þessa efnis eru nú í gangi en búist er við niðurstöðu fljótlega. Álfheiður Ingadóttir, heilbrigðisráðherra, sagði í samtali við fréttastofu í dag að það kæmi einnig til greina að sameinuð heilsugæslustöð miðborgarinnar og Hlíða fái aðstöðu í húsinu ásamt annarri heilsutengdri starfsemi.

Engin starfsemi hefur verið í húsinu í tæp tvö ár en það fyrst tekið í notkun á sjötta áratug síðustu aldar og um árabil var þar miðstöð heilsugæslu Reykjavíkur og nágrennis.