Svæfingalæknir falsaði reikninga

Efnahagsbrotadeild hefur ákært svæfingalækni fyrir að blekkja Tryggingastofnun ríkisins til að ofgreiða sér tæpar fimm milljónir króna á tveggja ára tímabili. Læknirinn framvísaði 265 röngum reikningum til stofnunarinnar. Brotin varða allt að sex ára fangelsi.

Læknirinn sem nú er búsettur í Svíþjóð er ákærður fyrir að hafa á árinu 2005, í starfi sínu sem svæfingalæknir, blekkt Tryggingastofnun ríkisins til að ofgreiða sér tæpa 2,1 milljón króna með því að framvísa 154 röngum reikningum. Meint svik héldu áfram frá janúar til október 2006 en þá framvísaði hann 111 röngum reikningum til Tryggingastofnunar og fékk ofgreiddar tæpar 2,7 milljónir króna. Læknirinn innheimti greiðslur fyrir svæfingar hjá tannlæknum sem voru vegna starfa tengdum svæfingum sem stofnuninni bar ekki að greiða fyrir sérstaklega samkvæmt gjaldskrá svæfingarlækna og samningi Tryggingastofnunar og Læknafélags Reykjavíkur.

Gerð er krafa að læknirinn greiði skaðabætur að fjárhæð 4,7 milljónum króna. Þá er þess krafist að hann verði dæmdur til greiðslu alls sakarkostnaðar og til refsingar en brotin varða allt að sex ára fangelsi.