Blindir efast um lögmæti kosninganna

„Það er grundvallarregla allra lýðræðisríkja að menn fái notið kosningaréttar síns við frjálsa kosningu og að þeir fái á kjörstað notið réttinda sinna til að kjósa fulltrúa sína með leynilegri kosningu."

Þetta segir í bréfi sem sent hefur verið til dóms- og mannréttindaráðherra frá lögmanni blindra og sjónskertra einstaklinga sem krefjast þess að mannréttindi þeirra verði virt í kosningum til stjórnlagaþings. Ragnar Aðalsteinsson er lögmaður þeirra fimm einstaklinga sem um ræðir.

Á vef dóms- og mannréttindaráðuneytisins segir að komið sé til móts við þarfir þessa hóps með því að heimila blindum og sjónskertum kjósendum að hafa með sér aðstoðarmann að eigin vali, en auk þess sé talið nauðsynlegt að kjörstjóri eða annar af hálfu kjörstjórnar sé viðstaddur þegar seðillinn er fylltur út. Hið sama gildi við atkvæðagreiðslu utan kjörfundar.

Ragnar fer fram á að ráðherra skýri þá stöðu sem uppi er varðar réttindi blindra og sjónskertra til jafnra réttinda á við aðra borgara við aðdraganda kosninga til stjórnlagaþings og þeirrar kynningar á frambjóðendum sem á undan hefur gengið og færi fram gild og málefnaleg rök til að réttlæta þá mismunun sem í framkvæmd kynningu á frambjóðendum til stjórnlagaþings felur í sér.

Þá gera umbjóðendur hans þá kröfu að bætt verði úr fyrirhugaðri framkvæmd og gerðar fullnægjandi ráðstafanir til að gera þeim kleift að kjósa til stjórnlagaþings án nauðsynlegs atbeina aðstoðarmanns og yfirsetu kjörstjóra eða fulltrúa frá kjörstjórn.

Verði því ekki komið við er því mótmælt af hálfu umbjóðenda að haft verði eftirlit með blindum og sjónskertum og aðstoðarmönnum þeirra í kjörklefa af hálfu kjörstjóra eða fulltrúa frá kjörstjórn

Ragnar segir að verði umbjóðendum hans og öðrum sem eins er ástatt um ekki gert kleift að beita kosningarétti sínum með sambærilegum hætti og öðrum borgurum, þá er dregið í efa að kosning til stjórnlagaþings sé lögleg og umbjóðendum hans áskilinn allur réttur í því samhengi.