Útlit á göngum stöðvarinnar verði óbreytt

„Fyrstu athuganir á mögulegum breytingum á húsnæðinu og kostnaði benda til að þær eru innan þeirra marka að áhugi er fyrir hendi að láta reyna á þessar hugmyndir um hótelrekstur í húsnæðinu,“ segir Sigurður Hallgrímsson arkitekt í bréfi sem hann sendir fyrir hönd Icelandair Hotels til borgaryfirvalda um Heilsuverndarstöðina á Barónsstíg.

Sigurður segir ætlunina að reka einfalt ferðamannahótel með áherslu á sölu á gistingu og morgunverði.

„Reiknað er með að hægt verði að ná um 90 herbergjum til útleigu, bæði með og án snyrtinga,“ segir í bréfi Sigurðar sem kveður þetta mundu verða „spennandi kostur fyrir nútíma ferðamanninn, þar sem um er að ræða einstaka staðsetningu í miðborginni í nálægð við Laugaveginn, Skólavörðuholtið og Sundhöll Reykjavíkur“.

Þá segir Sigurður að mikið sameiginlegt rými í húsinu eigi að nota til afþreyingar fyrir hótelgesti. Nokkrar breytingar þurfi að gera á húsnæðinu. „Fyrst og fremst er þar um að ræða, að koma fyrir salernum tengdum hótel­herbergjunum,“ segir Sigurður sem minnir á að húsið sé að hluta til verndað. Hugmyndin sé að ekki verði hróflað við útliti hússins og að útlit ganga og sameiginlegra rýma haldist óbreytt. Einungis verði breytt veggjum eða veggjaskipan milli útveggja hússins og berandi gangaveggja.

„Þessar breytingar munu því ekki sjást er komið er inn í húsið eftir framkvæmdir.“ - gar