Kostnaður Glitnis meiri en Kaupþings

Aðkeypt sérfræðiþjónusta að meðtöldum virðisaukaskatti þegar við á nam 3,4 milljörðum króna árið 2009 hjá skilanefnd og slitastjórn Glitnis. „Þar af námu greiðslur til erlendra aðila 2,6 milljörðum króna en 0,7 milljörðum króna til innlendra aðila," segir í svari við fyrirspurn blaðsins um kostnað skilanefnda bankanna vegna aðkeyptrar sérfræðiþjónustu.

Tekið er fram í svarinu að með í tölum um aðkeypta þjónustu innlendra aðila séu greiðslur til þeirra sem starfi í skilanefnd og slitastjórn Glitnis.

Upphæðirnar eru sambærilegar við þær sem skilanefnd Kaupþings hefur látið frá sér fara, en Fréttablaðið greindi frá því í síðustu viku að þar á bæ hefði ráðgjafarkostnaður numið 3,2 milljörðum króna í fyrra, 2,3 milljarðar fóru til fyrir­tækja utan landsteinanna og 894 milljónir króna innanlands.

Í svari skilanefndar Glitnis er tekið fram að gera megi ráð fyrir að kostnaður við aðkeypta sérfræðiaðstoð fari lækkandi á næstu misserum. „Eðli málsins samkvæmt er slíkur kostnaður mestur fyrstu tvö til þrjú árin í slitaferlinu," segir þar. Þá segir í svarinu að mikilvægt sé að hafa í huga að kostnaður við rekstur bús Glitnis greiðist af kröfuhöfum, sem séu að stærstum hluta erlendir aðilar eða um 80 prósent.

„Fulltrúar kröfuhafa fylgjast náið með starfsemi Glitnis og eru þeir reglulega upplýstir ítarlega um framvindu mála. Til að hámarka virði þeirra eigna sem eru í búi Glitnis hafa fulltrúar kröfuhafa lagt ríka áherslu á að leitað sé ráðgjafar og aðstoðar hjá færustu sérfræðingum á hverju sviði. Vegna umfangs búsins og flókinna verkefna sem við er að fást hefur eðli málsins samkvæmt reynst nauðsynlegt að leita til alþjóðlegra sérfræðinga í ríkum mæli."

Skilanefndir Glitnis og Kaupþings hafa upplýst um kostnað við kaup á sérfræðiþjónustu, en Landsbankinn neitar að veita sömu upplýsingar. - óká /