Garður tengist vatnsleiðslu

Hönnun nýrrar vatnsleiðslu á milli Garðs og Sandgerðis er á lokastigi.

Með tilkomu leiðslunnar mun Garðurinn tengjast vatnsveitu sveitarfélaganna úr Gjánni á Reykjanesi, eins og Víkurfréttir sögðu frá í gær.

Vatnstaka úr Gjánni hófst eftir að vatnsból á Nikkelsvæðinu svokallaða menguðust af völdum varnarliðsins.

Ný vatnsveita var þá byggð upp fyrir skaðabætur sem Bandaríkjaher greiddi. Féð átti að tryggja ferskvatn til bæjarfélaganna í Keflavík, Sandgerði og Garði.

Garður og Sandgerði hafa fengið vatn úr borholum þangað til fyrir nokkrum árum að leiðsla var lögð til Sandgerðis, en nú er röðin komin að Garði. - shá