Vetrarfærð á fjallvegum

Vegagerðin varar ökumenn við að enn er vetrarfærð á fjallvegum, einkum á norður- og austurhelmingi landsins, og tvær fjölfarnar heiðar eru ófærar, Eyrarfjall í Djúpi og Öxi ofan Berufjarðar. Á Vestfjörðum er hálka á Steingrímsfjarðarheiði og hálkublettir á Dynjandisheiði og Klettshálsi.

Á hringveginum norðaustanlands er snjóþekja á Mývatnsöræfum og hálka á Möðrudalsöræfum, Vopnafjarðarheiði og á Vatnsskarði eystra. Hálkublettir eru á Sandvíkurheiði.

Þá er hált á Fjarðarheiði, milli Seyðisfjarðar og Egilsstaða og snjóþekja og skafrenningur eru á Fagradal. Þá er þæfingsfærð á Breiðdalsheiði.