Rússar sármóðgaðir út í forseta Íslands

„[...] Við munum aðstoða Íslendinga. Eina vandamálið er að ákveðnir íslenskir stjórnmálamenn hafa verið tortryggnir í garð Rússa og viljað meina að við vildum aðstoða fjárhagslega til að fá afnot af Keflavíkurflugvelli eða nota okkur landið á annan hátt í pólitískum tilgangi. Að við myndum lána ykkur, en taka miklu meira í staðinn." segir Victor I. Tatarintsev í viðtali við Austurgluggann sem birtist á vef blaðsins í dag.

Í ummælum sínum vísar hann til umdeilds hádegisverðarfundar Ólafs Ragnar Grímssonar, forseta Íslands, þar sem hann gagnrýndi nágrannaþjóðirnar Svíþjóð, Danmörku og Bretland fyrir að snúa baki við Íslendingum eftir bankahrunið í nóvember á síðasta ári.

Þar á Ólafur Ragnar hafa hótað því að leita nýrra bandamanna þar sem núverandi bandamenn hefðu svikið landið.

Þá á forsetinn hafa viðrað þá hugmynd að Rússum yrði boðin aðstaða í gömlu herstöðinni á Keflavíkurflugvelli. Sjálfur á Victor að hafa setið hádegisverðarfundinn.

Í frétt sem birtist í fjölmiðlum í Noregi um málið á síðasta ári segir að hann hafi verið hissa en brosað og gefið þannig til kynna að Rússar hefðu ekki þörf fyrir það.

Það er ljóst að Rússar kunna illa við tortryggni Ólafs og segir í viðtalinu við Austurgluggann: „[...] Mér finnst hreinlega grátbroslegt að heyra meinta frjálslynda stjórnmálamenn á Íslandi tala svona. Þetta er fortíð."

Einnig kemur fram í viðtalinu að Rússalán sé enn raunhæft. Victor bendir þó á að málið sé mjög viðkvæmt. Sérfræðingar hafa málið til skoðunar. Eina vandmálið virðist því vera viðhorf Ólafs Ragnars gagnvart Rússunum.