Jóhanna brýnir mikilvægi ESB aðildar fyrir áhorfendum BBC

Það er mjög mikilvægt fyrir íslensku þjóðina að fá samning við Evrópusambandið sem Íslendingar eru sáttir við, sagði Jóhanna Sigurðardóttir forsætisráðherra í samtali við BBC, breska ríkisútvarpið. Jóhanna sagði að það væri jafnframt mikilvægt að fá niðurstöðu í sjávarútvegsmálin sem Íslendingar gætu sætt sig við.

Í fréttinni segir að Steingrímur J. Sigfússon fjármálaráðherra hafi meiri efasemdir um evruna og Evrópusambandið. „Sumir telja að þetta sé besta lausnin, jafnvel eina lausnin í stöðunni. Aðrir benda hins vegar á að það að hafa eigin gjaldmiðil með þeim sveigjanleika og aðlögunargetu sem það hefur í för með sér geti verið efnahagslífinu mjög hjálplegt," segir Steingrímur sjálfur í viðtalinu.

Í fréttinni segir jafnframt að Íslendingar snúi sér nú að grundvallaratriðum. Sjávarútvegurinn gangi vel og álframleiðsla gangi sömuleiðis vel. Hins vegar hafi Vinstri grænir mótmælt álverum hingað til.