23 þúsund geti krafist þjóðaratkvæðagreiðslu

Frumvarp fimm þingmanna um þjóðaratkvæðagreiðslur gerir ráð fyrir að tíu prósent kosningabærra manna geti krafist þjóðaratkvæðagreiðslu um tiltekið mál. Við þingkosningarnar í apríl höfðu rúmlega 227 þúsund atkvæðisrétt. Flutningsmenn eru þingmenn Hreyfingarinnar, Þráinn Bertelsson og Sigmundur Ernir Rúnarsson Samfylkingunni.

Í stjórnarfrumvarpi um þjóðaratkvæðagreiðslur, sem lagt var fram í sumar og kemur aftur fyrir þingið nú í haust, er ekki gert ráð fyrir að almenningur geti krafist þjóðaratkvæðagreiðslu. Í greinargerð með þingmannafrumvarpinu segir að stjórnarfrumvarpið sé óásættanlegt.

Spurður um ástæður fyrir flutningi frumvarps með fjórum stjórnarandstæðingum sagðist Sigmundur Ernir vilja styðja viðleitni þeirra enda hefði hann alla tíð verið fylgjandi þjóðaratkvæðagreiðslum. Sama væri hvaðan gott kæmi.

- bþs