Atli Fannar hættir sem ritstjóri Monitor

Atli Fannar Bjarkason hættir sem ritstjóri Monitor nú um mánaðamótin. „Monitor heldur áfram í núverandi mynd. Það stendur núna yfir leit að nýjum ritstjóra. Blaðið breytist bara eins og það gerir alltaf með nýjum ritstjóra, það er ekkert verið að leggja árar í bát,“ segir Atli.

„Ég er bara að breyta til. Mér bauðst annað og ákvað að stökkva á það, prófa eitthvað nýtt. Ég er búinn að vera með Monitor í eitt og hálft ár, það er búið að vera rosalega gaman og ganga mjög vel. Svo er bara gaman að halda áfram að prófa hluti.“

Auk þess að ritstýra blaðinu hefur Atli sést á Skjánum í þættinum Monitor, en hann lauk göngu sinni í síðustu viku. „Hann styrkti stöðu miðilsins mjög mikið að mínu mati. Við vorum að halda merkjum Monitor á lofti yfir sumarið þegar útgáfan er kannski ekki jafn sterk og hefur verið. Það heldur þessu vel á floti þótt árferðið sé ömurlegt.“ Stefnt er á útgáfu tveggja blaða það sem eftir er af árinu; annars í höndum Atla og hins í höndum nýs ritstjóra.

Útgáfustjóri Media sem sér um Monitor, Hrefna Björk Sverrisdóttir, er einnig að hætta. „Hún er að flytja út eins og svo margir, þannig að það verður alveg ný stjórn. Það verður spennandi að sjá hvernig það kemur út. Það eru allir að hætta út af því að eitthvað annað býðst og svolítið fyndið að það skuli allt gerast á sama tíma. Það kemur svolítið furðulega út, eins og einhver hallarbylting hafi orðið, en því fer fjarri. Ég vona bara að fólk fylgist með hver taki við keflinu. Þetta er elskulegt blað í hugum margra, þannig að það er bara spenna.“- kbs