Skotar unnu í samkeppni um Gömlu höfnina

Arkitektastofa í Edinborg í Skotlandi, Graeme Massie Architects, hlaut fyrstu verðlaun í A-hluta hugmyndasamkeppni sem Faxaflóahafnir sf. efndu til vegna skipulags Gömlu hafnarinnar og Örfiriseyjar í Reykjavík. Samstarfsaðili hennar á Íslandi er ráðgjafarfyrirtækið Alta ehf. Úrslitin voru tilkynnt við athöfn í Víkinni sjóminjasafni nú síðdegis um leið og sigurlaunin voru afhent, 7,5 milljónir króna. Allt í allt veittu Faxaflóahafnir 14 milljónir króna í verðlaun í samkeppninni.

Í tilkynningu segir að höfundar tveggja tillagna hafi deild 2.-3. sæti og hlutu hvorir um sig tvær milljónir króna í verðlaun: annars vegar arkitektarnir Björn Ólafs og François Perrot, hins vegar Þorsteinn Helgason, Gunnar Örn Sigurðsson, Páll Gunnlaugsson og Valdimar Harðarson arkitektar FAÍ hjá arkitektastofunni ASK arkitektum ehf. Viðurkenningu/innkaup fyrir athyglisverða tillögu hlaut Arkibúllan ehf., 500.000 krónur.

„Samkeppnin var tvískipt. Alls barst 51 tillaga, þar af 12 tillögur í A-hlutann, sem var ætlaður hönnuðum og öðru fagfólki og undirbúin í samvinnu við Arkitektafélag Íslands. B-hlutinn var hins vegar opinn öllum án nokkurra skilyrða og þar bárust 39 tillögur," segir í tilkynningunni.

„Átta tillögur hlutu verðlaun í B-hluta hugmyndasamkeppninnar, fjórar fengu 300.000 krónur og aðrar fjórar 200.000 krónur," segir ennfremur og kom það aðstandendum samkeppninnar þægilega á óvart hve margir sýndu viðfangsefninu áhuga með því að senda inn tillögur um leiðir til að auðga mannlíf og efla hafnarsvæðið. „Dæmi um hugmyndir er listaverk sem jafnframt gegnir hlutverki upplýsingamiðils fyrir almenning, fisk- og kjötmarkaður undir þaki á Miðbakka, graffítí-skreyting á útvöldum olíugeymum, leikvöllur með sjóræningjaskipi og sérstök lýsing á Miðbakka."

Allar tillögur verða til sýnis í Víkinni sjóminjasafni, Grandagarði 8, til 20. desember. Þar er opið alla virka daga kl. 11:00-17:00 og um helgar kl. 13:00-17:00.

Gert ráð fyrir sundlaug á Ægisgarði



„Dómnefnd segir að höfundum skosku verðlaunatillögunnar í A-hluta samkeppninnar hafi tekist að styrkja tengsl miðbæjarins og hafnarinnar og tileinka sér meginatriði framtíðarsýnar Faxaflóahafna sf., meðal annars með því að leggja til að umferð um miðbæinn verði færð út fyrir hafnarmynnið. Skýr skil eru á milli blandaðrar byggðar íbúðarhúsnæðis, athafna- og iðnaðarhúsnæðis og vettvangs menningar og viðskipta á svæðinu. Höfundarnir gera meðal annars ráð fyrir viðlegukanti fyrir skemmtiferðaskip, þjónustuhúsi fyrir ferðafólk og hóteli á nýjum stað í miðbænum, austan Tónlistar- og ráðstefnuhússins. Þeir gera og ráð fyrir sundlaug á Ægisgarði, í innhöfninni miðri, að Slippurinn verði áfram á sínum stað og olíubirgðastöðin sömuleiðis."

Metnaðarfullar tillögur vísa veginn til framtíðar

Júlíus Vífill Ingvarsson segir að markmið samkeppninnar hafi verið að kalla eftir fjölbreyttum og frumlegum hugmyndum um skipulag og nýtingu Gömlu hafnarinnar, svæði sem aldrei hefur verið gert af heildarskipulag. Faxaflóahafnir vonuðust til þess að verðlaunatillögurnar gætu nýst í vinnu við gerð heildarskipulags fyrir höfnina, bæði aðalskipulags og deiliskipulags. Júlíus Vífill Ingvarsson, formaður dómnefndar, segir að þær vonir hafi ræst. Faxaflóahafnir séu nú með í höndum metnaðarfullar tillögur sem vísað geti veginn í skipulagsmálum svæðisins til framtíðar.