Milljónafjárdráttur af söfnunarreikningi

Guðmundur Jónsson, fyrrverandi forstöðumaður Byrgisins, hefur verið ákærður fyrir milljónafjárdrátt, þar á meðal af tveimur söfnunarreikningum til styrktar Byrginu. Þá hefur Guðmundur, ásamt Jóni Arnari Einarssyni, fyrrverandi stjórnarmanni í Byrginu, verið ákærður fyrir meiri háttar brot gegn skattalögum og lögum um bókhald.

Guðmundi er gefið að sök að hafa dregið sér ríflega 3,3 milljónir króna þegar hann notaði kreditkort Eignarhaldsfélagsins Byrgisins og greiddi persónuleg útgjöld í 209 skipti á árunum 2005 og 2006. Þá er honum gefið að sök að hafa á ofangreindum árum dregið sér rúmar 1,6 milljónir frá eignarhaldsfélaginu Byrginu og líknarfélaginu Byrginu þegar hann lét félögin greiða kreditkortareikninga sína í 109 skipti.

Guðmundur er einnig ákærður fyrir að hafa dregið sér 96.500 krónur með tólf millifærslum af söfnunarreikningi aðstandenda Hauks Freys Ágústssonar til styrktar Byrginu. Einnig að hafa dregið sér 4,3 milljónir af söfnunarreikningi sem Svavar Dalmann safnaði í þágu Byrgisins líknarfélags. Guðmundur bæði millifærði og tók út af söfnunarreikningunum. Samtals nemur fjárdrátturinn ríflega 9,3 milljónum króna.

Þá eru Guðmundur og Jón Arnar ákærðir fyrir vantaldar launagreiðslur að upphæð 9,6 milljónir króna og vangoldna staðgreiðslu opinberra gjalda að upphæð 3,6 milljónir. Guðmundur er svo ákærður fyrir að telja ekki fram á skattskýrslu bifreiðahlunnindi sín árin 2004 og 2005, að upphæð 1,5 milljónir og hafa með því komið sér undan því að greiða tekjuskatt og útsvar upp á tæpar 600 þúsund krónur.

Jón Arnar er ákærður fyrir að hafa komið sér undan greiðslu tekjuskatts og útsvars að upphæð 1,4 milljónir með vantalningu á skattaframtali sínu.

Þá eru báðir ákærðir fyrir meiri háttar bókhaldsbrot í störfum sínum fyrir Byrgið með því að varðveita ekki fylgiskjöl með fullnægjandi hætti.

Guðmundur afplánar nú tveggja og hálfs árs fangelsisdóm á Litla- Hrauni. Hann var dæmdur fyrir kynferðisbrot gegn skjólstæðingum sínum í Byrginu.

jss@frettabladid.is