Júróvisjón-hópurinn ekkert var við mótmæli samkynhneigðra

„Við höfum ekkert orðið var við þetta," segir Jónatan Garðarson, dagskrágerðarmaður RÚV sem leiðir júróvisjón hópinn en mótmælaganga samkynhneigðra var stöðvuð af óeirðarlögreglunni fyrr í dag.

Fjöldinn allur af hommum og lesbíum voru handtekin fyrir að krefjast réttinda fyrir samkynhneigða í Rússlandi.

Tímasetning göngunnar er engin tilviljun enda beinist kastljós fjölmiðla að júróvisjón keppninni en aðalkeppnin fer fram í kvöld. Hollendingar sögðu í heimspressunni að þeir myndu ekki stíga á svið ef rússnensk yfirvöld myndu stöðva gönguna. Það skiptir reyndar ekki máli úr þessu því þeir duttu út í undankeppninni.

Söngvari Dana hótaði því að það væri mögulegt að hann myndi tjá sig um málið á sviði. Því verður spennandi að fylgjast með þeirra framlagi.

Jónatan segir að hótel Íslendinganna sé fjarri Rauða torginu og því hafi þau ekki orðið var við átökin. Að auki hafi miðlar sem sérhæfa sig í fréttaflutningi frá keppninni ekki haft mörg orð um mótmæli samkynhneigðra í Rússlandi.

„Við erum bara að hvíla okkur á hótelinu," segir Jónatan hin rólegasti og bætir svo við að hópurinn hafi farið í gegnum strangar æfingar undanfarnar tvær vikur og því séu meðlimir hans orðnir þreyttir.

Hann segir alla mjög spennta fyrir kvöldinu. Þau eru himinlifandi yfir að hafa komist áfram og vona það besta án þess að gera sér neinar sérstakar vonir.

„Við gerum þetta bara með elegans," segir Jónatan að lokum.