Aukið samstarf háskóla í deiglunni

Til greina kemur að auka samstarf háskóla á Íslandi til þess að ná fram aukinni hagræðingu, að sögn Katrínar Jakobsdóttur menntamálaráðherra. Katrín segist hafa rætt breytingar á starfi skólanna til að ná fram aukinni hagræðingu. „En ekki sameiningu háskólanna endilega heldur aukið samstarf að minnsta kosti. Jafnvel hvernig hægt er að skipta verkum meira en verið hefur," segir Katrín.

Samkvæmt upplýsingum á vef menntamálaráðuneytis eru sjö háskólar starfandi í landinu og hugsanlega er hægt að skera niður ríkisútgjöld með því að ná fram hagræðingu í rekstri þeirra. Katrín bendir þó á að í skólunum hafi verið byggt upp mjög merkilegt starf sem mikilvægt sé að viðhalda á sama tíma og auknu samstarfi sé náð fram.

Katrín segir að þetta yrði gert til að ná fram aukinni hagræðingu við rekstur skólakerfisins til lengri tíma litið. „En þetta er eitthvað sem tekur kannski svolítinn tíma að koma á," segir Katrín. Hún bendir á að innan skólanna sé vilji til þess að auka samstarf, til dæmis með því að nemendur geti tekið námskeið í öðrum skólum en þeim sem þeir eru skráðir við nám í.

Að lokum bendir ráðherrann á að þótt þessi mál hafi verið rætt séu þau ekki komin á neitt ákvörðunarstig. En unnið verður áfram í þeim anda sem hefur verið gert.