Hækkun á fötum og skóm kemur á óvart

„Verðbólgutölurnar eru í takt við væntingar. En verðhækkanir á fötum og skóm koma okkur á óvart,“ segir Snorri Jakobsson, sérfræðingur hjá IFS Greiningu.

Verðbólga mælist nú 10,8 prósent samanborið við 10,9 prósent í ágúst. Þetta er jafnframt þriðji mánuðurinn í röð sem dregur úr verðbólgu eftir uppskot í apríl og maí. Fyrir ári stóð verðbólgan í fjórtán prósentum en hæst fór hún í 18,6 prósent í janúar á þessu ári. Hún hefur ekki verið lægri síðan í apríl í fyrra en um svipað leyti tók gengi krónu að lækka hratt.

Verð á bensíni og dísilolíu lækkaði um 2,7 prósent á milli mánaða auk þess sem verð á flugfargjöldum til útlanda fór niður um 12,7 prósent. Hins vegar hækkaði verð á mat- og drykkjarvöru um 1,7 prósent. Þetta er undir spá IFS Greiningar, sem gerði ráð fyrir 2,5 prósenta hækkun á mat- og drykkjarvöruverði vegna áhrifa sykurskattsins og lagðist á ákveðna vöruflokka um síðustu mánaðamót. Af þessum sökum telur Snorri að jafnvel megi gera ráð fyrir að verð á vörum sem skatturinn nær ekki til, svo sem kjötvörum, breytist lítið eða lækki á næstu mánuðum.

Verð á fatnaði og skóm hækkaði um 6,2 prósent á milli mánaða. Snorri segir að það hafi komið á óvart og sýni að föt eru orðin verulega dýrari en fyrir útsölur í sumar.

„Þetta helst líklega aðeins í hendur við gengisþróun,“ segir hann og bætir við að spár hljóði upp á að hratt dragi úr verðbólgu á næstu mánuðum. jonab@frettabladid.is