Samgönguráðherra furðar sig á gagnrýni á Símasamninginn

Kristján Möller samgönguráðherra furðar sig á síðbúinni gagnrýni netþjónustufyrirtækisins Emax á samningi við Símann um að koma háhraðanettenginu til afskekktra bæja. Emax fullyrðir að tæpur fjórðungur bæjanna sem Síminn ætlar að nettengja fyrir hátt í milljarð úr ríkissjóði séu þegar í dreifikerfi Emax. Ráðherra lofar engu um endurskoðun samningsins en kveðst ætla að skoða málið.

Framkvæmdastjóri Emax sakaði samgönguráðherra um að sólunda hundruðum milljóna króna af fé skattborgara í fréttum okkar í gær með því að semja við Símann um að byggja upp háhraðanet fyrir bæi sem þegar eru á dreifikerfi Emax. Samningurinn var undirritaður síðla vetrar og ætlar Síminn að tengja um 1800 afskekkta bæi, fyrr rúmar 600 milljónir króna. Raunar upplýsti samgönguráðherra tveimur dögum eftir undirritun að líklega færi kostnaðurinn upp í milljarð. Af þessum 1800 bæjum geta 400 þegar keypt tengingu hjá Emax, segir framkvæmdastjóri fyrirtækisins og er ekki sáttur. Útboðsgögn í haust gerðu ráð fyrir að tengja um 1100 bæi en tæplega sjöhundruð var bætt inn í samninginn segir ráðherra eftir að ráðuneytinu barst sú vitneskja um áramót að áætlanir tveggja netþjónustufyrirtækja um að víkka út dreifikerfi sitt hafi ekki gengið eftir. Því hafi verið auglýst eftir fyrirtækjum sem vildu sinna þessum bæjum í janúar. Enginn hafi hins vegar svarað þeirri auglýsingu, hvorki Emax né önnur fyrirtæki.

Ráðherra var inntur eftir því í samtali við fréttastofu í dag hvort þessar nýju upplýsingar frá Emax, sem benda til að ríkið muni verja tugum eða hundruðum milljóna eða meira í að nettengja bæi sem þegar geta keypt nettengingu, yrðu til þess að ráðherra endurskoðaði samninginn við Símann? Við munum fara yfir málið, segir ráðherra, en ekkert verði gert sem geti tafið að landsbyggðin fái háhraðatengingu sem hún hafi beðið alltof lengi eftir.