Umdeildur sálfræðihrollur

Sálfræðihrollvekjan Anti­christ eftir Lars von Trier verður frumsýnd annað kvöld. Hún er ein fimm mynda sem hafa verið tilnefndar til Kvikmyndaverðlauna Norðurlandaráðs og sem Græna ljósið sýnir um helgina.

Antichrist fjallar um hjón sem lenda í miklum erfiðleikum og konan fær ofsaleg kvíðaköst. Með það að markmiði að græða brostin hjörtu og lagfæra hjónabandið fara þau til afskekkts bústaðar sem þau eiga úti í skógi. Dvölin verður undarlegri og hryllilegri en þau gætu nokkru sinni hafa ímyndað sér þegar náttúran tekur völdin og allt fer á versta veg. Atburðirnir reyna verulega á samband þeirra og þau neyðast til að takast á við sig sjálf og ótta sinn í leiðinni.

Antichrist var kynnt á kvikmyndahátíðinni í Cannes í vor og vakti hún skelfingu hjá áhorfendum og varð umtalaðasta myndin á hátíðinni. Sumir kölluðu hana meistaraverk á meðan aðrir gagnrýndu hana fyrir að vera meðvitað ögrandi og að hún gengi allt of langt í blöndu sinni af hryllingi og erótík.

Kvikmyndin hlaut ein verðlaun, Charlotte Gainsbourg var valin besta leikkonan.

Með hlutverk eiginmannsins fer Willem Dafoe sem hefur áður leikið fyrir Trier í myndinni Manderlay. Leikstjórinn Lars von Trier er einn fremsti kvikmyndagerðarmaður Dana. Á ferilsskrá hans eru myndir á borð við Breaking the Waves, Idioterne, Dancer in the Dark og nú síðast Direktøren for det hele með Friðrik Þór Friðriksson og Benedikt Erlingsson á meðal leikara. Myndir hans vekja oftar en ekki mikið umtal og er Antichrist þar engin undantekning.

Auk Antichrist verða sýndar í Háskólabíói myndirnar Norður eftir Norðmanninn Rune Denstad Langlo, Sána eftir AJ Annilla frá Finnlandi og Queen Raquela eftir Ólaf Jóhannesson og Ljósár eftir Svíann Mikael Kristersson, sem verður viðstaddur sýningu myndar­innar kl. 18 á laugardaginn. Ein þessara fimm mynda hlýtur síðan Kvikmyndaverðlaun Norðurlandaráðs sem verða veitt í sjötta sinn 21. október.

Fimm mynda afsláttarpassar eru fáanlegir á 3.000 krónur. Allar myndirnar eru með enskum texta, nema Antichrist sem af einhverjum ástæðum verður með frönskum texta. Hún fer síðan í almennar sýningar 28. september.