Gylfi: Þjóðarbúið rambar ekki á barmi gjaldþrots

Það er fullkominn misskilningur að þjóðarbúið hér rambi á barmi gjaldþrots, þvert á móti er útlit fyrir að hreinar skuldir íslenska ríkisins verði jafnvel minni en margra nágrannaríkja þegar um hægist, þetta segir Gylfi Magnússon, viðskiptaráðherra, í grein í miðopnu Morgunblaðsins þar sem hann reynir að stappa stálinu í þjóðina.

Hann segir jafnframt að fyrir hrun hafi erlendar skuldir þjóðarbúsins verið óviðráðanlegar. Meirihluti þessara skulda séu nú kröfur á þrotabú bankanna og hverfi eftir uppgjör þeirra. Eftir standi þá aðeins skuldir annarra fyrirtækja, heimila og hins opinbera.

Tjónið við hrunið sé fyrst og fremst peningalegar eignir, það er að segja markaðsvirði hlutabréfa og eigið fé fyrirtækja. Mest sé þó tjónið hjá þeim sem áttu kröfur á íslenska banka. Það séu því einkum evrópskir bankar og íslenskir lífeyrissjóðir og fleiri sem hafi tapað þúsundum milljarða á hruninu.

Raunverulegar eignir séu hins vegar óskemmdar, mannauðurinn, mannvirkin og náttúruauðlindirnar. Leikur einn sé að koma á fót nýju fjármálakerfi við slíkar aðstæður miðað við það til dæmis að reisa aftur hagkerfi þar sem raunverulegar eignir hafa skemmst, vegna stríðs eða hamfara.

Endurreisn fjármálakerfisins lýkur á næstu vikum, segir Gylfi. Þá verði Ísland í þeirri öfundsverðu stöðu, að sitja ekki uppi með fársjúkt fjármálakerfi sem dæla þarf skattpeningum inn í. Vandamálin hafi að miklu leyti verið skilin eftir í þrotabúum bankanna.

Árið 2009 verður erfitt, segir Gylfi, þá verður samdrátturinn og atvinnuleysið mest og varla fari hér að hjarna við heldur á næsta ári. Ríkið þurfi að skera niður, það megi hins vegar vel leysa með skynsamlegum hætti og bendir hann á að samneyslan hafi vaxið um 40% frá 1998 til 2007 - þótt landsmönnum hafi aðeins fjölgað um 13%. Því sé engin ástæða til svartsýni fyrir íslenska þjóð.