Umfjöllun: Langþráður sigur Fjölnis

Fjölnismenn unnu gríðarlega mikilvægan sigur á Stjörnunni í Pepsi-deild karla í kvöld. Þeir lyftu sér þar með úr fallsæti en Stjarnan situr í 3.sæti deildarinnar með jafn mörg stig og Fylkir.

Stjörnumenn mættu með hálf vængbrotið lið til leiks í Grafarvoginum í kvöld. Þeirra hættulegustu sóknarmenn í sumar, þeir Arnar Már Björgvinsson og Steinþór Freyr Þorsteinsson, voru báðir fjarri góðu gamni vegna meiðsla og sömuleiðis varnartröllið Tryggvi Sveinn Bjarnason.

Það virtist taka Stjörnumenn tíma til að jafna sig á fjarveru þessara lykilmanna. Leikur þeirra var ekki góður í fyrri hálfleik og Fjölnismenn voru sterkari aðilinn í hálfleiknum.

Jónas Grani Garðarsson hefði átt að koma heimamönnum yfir þegar hann skallaði yfir markið af markteig en Andri Valur Ívarsson gerði hins vegar allt rétt þegar hann skoraði fyrsta mark leiksins á 36.mínútu. Magnús Björgvinsson átti þá skelfilega sendingu til baka á Bjarna Þórð í markinu, Andri Valur komst inn í sendinguna, lék framhjá Bjarna og skoraði auðveldlega.

Stjörnumenn mættu síðan dýrvitlausir til leiks í síðari hálfleik. Þeir fengu eitt dauðafæri áður en Magnús bætti fyrir mistökin með góðu marki og jafnaði metin í 1-1. Eftir markið ógnuðu gestirnir marki Fjölnis í nokkur skipti en heimamenn unnu sig síðan smátt og smátt aftur inn í leikinn.

Það var svo Húsvíkingurinn knái, Jónas Grani Garðarsson, sem kom heimamönnum yfir á nýjan leik með marki eftir að hafa sloppið í gegnum vörn Stjörnunnar. Garðbæingar voru vægast sagt ósáttir við markið og vildu meina að Jónas Grani hefði lagt fyrir sig boltann með hendinni en markið stóð og heimamenn komnir yfir.

Eftir þetta lögðu Stjörnumenn allt kapp á að jafna en það voru hins vegar heimamenn sem bættu í og Gunnar Már Guðmundsson skoraði þeirra þriðja mark úr vítaspyrnu sem Þorvaldur Árnason dæmdi eftir að Bjarni markvörður felldi Jónas Grana.

Halldór Orri Björnsson fékk svo rautt spjald á síðustu andartökum leiksins fyrir glórulausa tæklingu úti á miðjum velli.

Nokkuð sanngjarn sigur Fjölnis staðreynd og þeir lyftu sér þar með úr fallsæti og fóru uppfyrir bæði ÍBV og Grindavík.

Fjölnir - Stjarnan 3-1

1-0 Andri Valur Ívarsson (36.mín)

1-1 Magnús Björgvinsson (55.mín)

2-1 Jónas Grani Garðarsson (76.mín)

3-1 Gunnar Már Guðmundsson (víti) (83.mín)

Áhorfendur: Óuppgefið

Dómari: Þorvaldur Árnason (7)

Skot (á mark): 10 - 11 (4 - 6)

Varin skot: Hrafn 5 - Bjarni 1

Horn: 4 - 6

Aukaspyrnur fengnar: 14 - 10

Rangstöður: 7 - 0

Fjölnir (5-2-3)

Hrafn Davíðsson 7 - Maður leiksins

Illugi Þór Gunnarsson 6

Ásgeir Aron Ásgeirsson 5

Ólafur Páll Johnson 5

Gunnar Valur Gunnarsson 5

Vigfús Arnar Jósepsson 5

Magnús Ingi Einarsson 6

Gunnar Már Guðmundsson 6

Tómas Leifsson 6

(88 Aron Jóhansson -)

Jónas Grani Garðarsson 6

(84 Ragnar Heimir Gunnarsson -)

Andri Valur Ívarsson 7

(74 Kristinn Freyr Sigurðsson -)

Stjarnan (4-5-1)

Bjarni Þórður Halldórsson 4

Bjarki Páll Eysteinsson -

(9 Baldvin Sturluson 5)

Guðni Rúnar Helgason 5

Daníel Laxdal 4

Hafsteinn Rúnar Helgason 4

Jóhann Laxdal 5

Björn Pálsson 5

Halldór Orri Björnsson 6

Birgir Hrafn Birgisson 6

(77 Richard Hurlin -)

Magnús Björgvinsson 6

(86 Heiðar Atli Emilsson -)

Ellert Hreinsson 6