Húsvíkingar leita svara hjá ríkisstjórn

Forystumenn á Húsavík eru orðnir órólegir að fá ekki skýr svör frá ríkisstjórninni en áform um álver á Bakka gætu heyrt sögunni til í næstu viku hafni stjórnvöld verkefninu. Sveitarstjóri Norðurþings flaug því suður í dag en hann vonast til að fá áheyrn æðstu ráðamanna. Hann fær væntanlega fund á morgun með Katrínu Júlíusdóttur iðnaðarráðherra. Hún kveðst vera að vinna að málinu en segist ekkert hafa meira að segja.

Af svörum ráðherra í dag er ekki hægt að átta sig á hvað ríkisstjórnin vill gera. Svandís Svavarsdóttir umhverfisráðherra sagði þó að framlenging viljayfirlýsingar væri á skjön við pólitík vinstri grænna.

Í síðustu viku kváðust oddvitar ríkisstjórarinnar vilja horfa til fleiri kosta en álvers á Bakka. Bergur Elías Ágústsson segir að í Þingeyjarsýslum viti menn ekki hvað þetta annað er.

"Við erum með gott verkefni sem við höfum unnið að af miklum heilindum. Og það viljum við klára," segir Bergur Elías.

Bergur segir að enn séu nokkrir dagar til stefnu. Ennþá trúi hann því að viljayfirlýsingin verði framlengd.