Rússar vilja ekki lána Íslendingum

Rússland hefur synjað Íslendingum um lán en til stóð að þeir myndu lána Íslandi allt að 500 milljón dollara lán samkvæmt Reuters.

Það var á miðvikudaginn sem fjármálaráðuneytið í Rússlandi tilkynnti þetta.

Þar kemur fram að Rússar hafi ekki viljað lána Íslendingum í ljósi slæmrar stöðu í fjármálum rússneska ríkisins.

Rætt er við nafnlausan embættismann á Íslandi en þar segir að menn hér á landi hafi verið búnir að missa alla von á að fá lánið í ljósi þess að ríkin hafa staðið í samningaviðræðum um það í tæpt ár.

Nafnlausi embættismaðurinn sagði ennfremur að Íslendingar væru búnir að gera samkomulag við AGS. Í ljósi þess væri ekki nauðsynlegt að fá lán hjá Rússum til þess að rétta íslenskan efnahag við.