Bjarni Benediktsson: Við köstum öllu frá okkur

„Í þessu máli þá hefur verið vegið að sjálfstæði íslensku þjóðarinnar af þessum ríkjum og öðrum þeim sem hafa neitað okkur um þann sjálfsagða rétt að fá skorið úr um þetta mál hjá hlutlausum dómstólum," segir formaður Sjálfstæðisflokksins, Bjarni Benediktsson ómyrkur í máli þegar Vísir ræddi við hann um niðurstöðu ríkisstjórnarinnar í Icesave-málinu.

Hann segir að ríkisstjórnin hafi ákveðið að fella sig við þetta misrétti og það standi ekki steinn yfir steini sem ríkisstjórnin samþykkti í sumar.

„Það á um lagalega fyrirvara, efnahagslega fyrirvara og allt það sem máli skipti á sumarþinginu," segir hann.

Hann segir að ríkisstjórnin hafi einfaldlega ákveðið að gera skuldir einkabankanna að skuldum almennings og um leið falla frá öllum þeim rétti til þess að láta á þetta mál reyna fyrir dómstólum.

Spurður hvort sameiginleg yfirlýsing fjármálaráðherranna þriggja um viðurkenningu á að Ísland beri ekki lagaleg skylda til þess að greiða þessar skuldir segir Bjarni: „Það er bara sjónarspil og hefur enga þýðingu fyrir réttarstöðu Íslendinga í þessu máli."

Hann bætir svo við að lokum: „Við köstum þarna öllu frá okkur. Ef það fellur dómur sem væri okkur í hag þá skrifuðum við upp á að við njótum ekki góðs af því. Því er verið að afsala okkur slíkum grundvallarréttindum að annað eins hefur ekki sést í lýðveldissögunni."