Margrét Tryggvadóttir: Setur okkur í sömu stöðu og þróunarríki

„Það er náttúrulega búið að eyðileggja þessa efnahagslegu fyrirvara," segir Margrét Tryggvadóttir, þingmaður Hreyfingarinnar um niðurstöðuna í Icesave-málinu.

Hún segir að það jákvæða við þetta sé þó það að tillaga Hreyfingarinnar um að leita verði allra ráða til þess að endurheimta Icesave-innistæðurnar haldi sér inn í samkomulaginu.

Margrét segir það hinsvegar grafalvarlegt að ákvæðið um 2024 haldi sér ekki, „og það setur okkur í sömu stöðu og þróunarríki sem geta aldrei neitt annað en greitt vextina," segir hún en ef Ísland verður ekki búið að greiða skuldina fyrir þann tíma þá lengist tíminn til þess að greiða skuldina um sex ár. Svo fimm ár eftir það.

Aðspurð hvernig henni lítist á niðurstöðuna í heild sinni segir Margrét: Mér líst ekki nógu vel á þetta. Það er forkastanlegt að Alþingi setji lög og svo er það borið undir Hollendinga og Breta. Það er bara forkastanlegt."