Framkvæmdastjórn sökuð um fordóma

„Það blasir við að þarna býr eitthvað annað að baki en sparnaður. Það flögrar að manni að þarna sé um að ræða fordóma framkvæmdastjórnarinnar í garð geðsjúkra, því þeir liggja neðst í píramídanum,“ segir Kristján Jósteinsson, forstöðumaður dagdeildar geðdeildar Sjúkrahússins á Akureyri (FSA). Þann 30. desember síðastliðinn var tilkynnt um þá ákvörðun að loka dagdeildinni í núverandi mynd 31. janúar næstkomandi og sameina rekstur dag- og göngudeildar geðdeildar í nýju húsnæði þann 1. október. Sjö starfsmönnum dagdeildar var afhent uppsagnarbréf sama dag og ákvörðunin var tilkynnt.

Fjárhagsrammi FSA á þessu ári verður þrengri en á síðasta ári sem nemur 250 til 300 milljónum króna. Teknar hafa verið nokkrar ákvarðanir til að bregðast við þeirri lækkun, meðal annars með uppsögnum rúmlega fjörutíu starfsmanna í tuttugu stöðugildum og fyrrgreindri tímabundinni lokun á dagdeild geðdeildar. Geðdeildinni var gert að skera niður kostnað um 17,5 milljónir á árinu 2009.

Kristján segir dagdeildarþjónustu hafa verið helsta vaxtarbroddinn í þjónustu geðdeildarinnar síðustu ár. Starfsfólk deildarinnar sé því slegið yfir lokuninni. „Þetta er auðvitað mikið áfall. Með þessu er verið að færa geðdeildarþjónustu á landsbyggðinni mörg ár aftur í tímann. Auðvitað hefði átt að spara þessa upphæð með því að jafna niðurskurðinum á hinar þrjár deildir geðsviðsins, bráðamóttökudeild, dagdeild og göngudeild. Við lögðum á borð tillögur um 6,5 prósent sparnað án þess að skaða meðferðarkjarnann. Þetta er sláandi,“ segir Kristján, og bætir við að allt að fjörutíu sjúklingar á ári hafi sótt þjónustu á dagdeildina síðustu ár.

Ætlunin hafi verið að fjölga þeim sjúklingum í fimmtíu til sextíu á yfirstandandi ári.

Spurður um hugsanleg úrræði fyrir þennan sjúklingahóp í þá átta mánuði, frá febrúar til október, þar til starfsemi sameinaðrar dag- og göngudeildar á að hefjast er Kristján myrkur í máli. „Það eru engin önnur úrræði. Framkvæmdastjórnin hefur hugmyndir um að hægt sé að sinna þessu fólki á göngudeild, en það eru einungis orðin tóm. Göngudeildin annar ekki eftirspurn eins og staðan er í dag.“

Halldór Jónsson, forstjóri FSA, segir vissulega myndast ákveðið skarð í þjónustu geðdeildar með þessum aðgerðum. Hann vonast til að fyrr en síðar finni menn hinni sameiginlegu einingu ágætan farveg á nýjum stað. „Þetta er ákvörðun sem er tekin sameiginlega með stjórnendum geðdeildar og í henni liggja sannarlega möguleikar. Auðvitað vill enginn gera svona hluti, en menn vega og meta hvað þurfi undan að láta og víkja til hliðar. Þetta er eitt af því,“ segir Halldór Jónsson.

kjartan@frettabladid.is