Borgarahreyfing: Framkvæmdarstjóri vill ekki ofurlaun

Framkvæmdarstjóri Borgarahreyfingarinnar, Jóhann Kristjánsson, segist ekki hafa gert launakröfu upp á 7.7 milljónir. Hann hafi eingöngu notað það sem viðmið hefði hreyfingin viljað umbuna honum fyrir að gegna starfi kosningastjóra fyrir síðustu þingkosningar.

Mikill átakafundur var hjá Borgarahreyfingunni í gærkvöldi en þar lagði Jóhann fram ætlaðan kostnað fyrir hreyfinguna væri þjónusta hans aðkeypt en ekki sjálfboðavinna eins og raunin var.

„Ég sýndi fram á framlag mitt með því," segir Jóhann og þvertekur fyrir að hafa sett fram einhverjar launakröfur hvað það varðaði. Hann segist þó hafa stungið upp á því, hefði hreyfingin áhuga á því að umbuna honum fyrir störf sín, að fimm prósent af 7.7 milljónunum væri þá nærri lagi. En það eru tæpar 400 þúsund krónur. Stjórnin neitaði í gær að samþykkja þau laun.

„Ég veit ekki afhverju þetta mál kemur svona upp," segir Jóhann sem nú starfar sem framkvæmdarstjóri þingflokks Borgarahreyfingarinnar.

Um átakafundinn segir Jóhann að hann hafi einkennst af misskilningi og jafnvel vitlausum upplýsingum. Þar hafi til að mynda verið haldið fram að Borgarahreyfingin hygðist leigja hornskrifstofu á besta stað í bænum. Það sé þó ekki rétt.

„Þessi átök voru ekki lýsandi fyrir hreyfinguna," segir Jóhann að lokum.