Guðjón Þórðarson rekinn frá Crewe

Guðjón Þórðarson var í morgun rekinn sem knattspyrnustjóri enska fótboltafélagsins Crewe Alexandra en kornið sem fyllti mælinn var 3-2 tap liðsins fyrir Bury á þriðjudagskvöldið sem var fjórða tap liðsins í röð í ensku d-deildinni.

Guðjón kom til Crewe í desember á síðasta ári en tókst ekki að bjarga liðinu frá falli í D-deildina. Crewe-liðið er sem stendur í 15. sæti deildarinnar með aðeins fjóra sigra í fyrstu tíu leikjum sínum.

Dario Gradi mun taka tímabundið við Crewe og mun stjórna liðinu gegn Rotherham United á morgun. Gadi er 68 ára gamall og er sá stjóri sem hefur stjórnað Crewe lengst en hann var í stjórastólnum í yfir 1200 leikjunum félagsins á árunum 1983 til 2007.

„Við höfum metnað til þess að komast aftur upp í C-deildina eins fljótt og auðið er. Úrslitin í undanförnum leikjum hafa ekki verið góð og það var ljóst að við þyrftum að gera breytingar sem fyrst," sagði John Bowler, stjórnarmaður Crewe við BBC.

Crewe vann 8 af fyrstu 13 leikjunum undir stjórn Guðjóns og hann var valinn stjóri mánaðarins í febrúar. Crewe-liðið náði hinsvegar ekki að vinna í síðustu tíu leikjunum sínum sem kostaði liðið fall niður í D-deildina.

Crewe byrjaði síðan tímabilið vel og vann fjóra af fyrstu fimm leikjum sínum en síðan hefur allt gengið á afturfótunum og liðið hefur sem dæmi fengið á sig 12 mörk í síðustu fjórum leikjum sem hafa allir tapast.