Selur merki til styrktar Rebekku

Pétur Sigurgunnarsson hefur sett af stað söfnun til að styðja við bakið á Rebekku Maríu Jóhannesdóttur, 22 ára stúlku í Hafnarfirði, sem missti báða foreldra sína með skömmu millibili og vonast nú til að fá forræði yfir tveimur barnungum bræðrum sínum. Rebekka á auk þess von á sínu fyrsta barni í nóvember.

Söfnunin felst í því að seld verða barmmerki í völdum verslunum í Garðabæ og Hafnarfirði næstkomandi föstudag og laugardag. Allur ágóði af sölunni rennur til Rebekku og bræðra hennar. Tímasetningin er valin vegna þess að móðir Rebekku, Soffía Margrét Jónsdóttir, hefði orðið fertug á föstudag en hún lést af völdum heilaæxlis í lok ágústs síðastliðins.

Pétur hannaði barmmerkin sjálfur en þau sýna þrjá hvíta hringi í bláu húsi. „Hringirnir tákna systkinin þrjú undir sama þaki," segir Pétur. Hann vantar um 40 sjálfboðaliða til að aðstoða við sölu merkjanna og reiknar með að hver þeirra þurfi einungis að standa vaktina í 3-4 klukkustundir. Þeir sem vilja og geta lagt söfnuninni lið geta haft samband við Pétur með því að senda póst á netfangið hondihond@gmail.com.