Jákvæð kona

Kryddpían fyrrverandi, Victoria Beckham, segist ekki hafa viljað taka sæti Paulu Abdul sem Idol-dómari þótt henni hafi þótt gaman að hafa fengið að dæma í tveimur þáttum.

„Ellen á eftir að vera frábær í þessu hlutverki. Mér sjálfri fannst fínt að fá að prófa þetta og geta svo haldið áfram í öðru. Þarna var margt hæfileikaríkt fólk sem tók þátt," sagði Beckham sem að eigin sögn reyndi að vera jákvæð í garð þátttakenda.

„Ég fann alltaf eitthvað jákvætt til að segja um hvern og einn. Ég er mjög andlega þenkjandi og trúi því að maður uppskeri sem maður sái, þess vegna fann ég alltaf eitthvað fallegt til að segja."