Aðildarumsókn fyrir þingið í vor - nýr stjórnarsáttmáli

Utanríkisráðherra mun leggja fram á vorþingi tillögu um aðildarumsókn að Evrópusambandinu. Þetta kemur fram í nýjum stjórnarsáttmála Samfylkingarinnar og Vinstri-grænna. Stuðningur stjórnvalda við samninginn er háður ýmsum fyrirvörum.

Steingrímur J. Sigfússon, formaður VG og fjármálaráðherra, sagði á blaðamannafundi í Norræna húsinu í dag að það væri vissulega málamiðlun sem einhverjir ættu erfitt að sætta sig. Flokkurinn væri áfram andvígur inngöngu í Evrópusambandið. Þá sagði hann þingmenn bundna sannfæringu sinni þegar kemur að því að kjósa um tillögu utanríkisráðherra.

Jóhanna Sigurðardóttir, formaður Samfylkingarinnar og forsætisráðherra, sagðist vera stolt og afar ánægð með að nú væri verið að mynda ríkisstjórn félagshyggjufólks og jafnaðarmanna.

Stjórnkerfisbreytingar

Fram kom í máli Jóhönnu að ráðuneytum verður fækkað úr 12 í 9 á kjörtímabilinu. Stofnað verður sérstakt atvinnuvegaráðuneyti eigi síðar en um mitt kjörtímabilið. Strax verður stofnað nýtt ráðuneyti efnahagsmála í stað viðskiptaráðuneytis og færast verkefni frá forsætis- og fjármálaráðuneytinu. Seðlabankinn og Hagstofan mun einnig heyra undir hið nýja efnahagsmálaráðuneyti. Þá er stefnt á að sameina verkefni og stofna nýtt innanríkisráðuneyti sem meðal annars mun innihalda samgönguráðuneytið.

Aflaheimildir innkallaðar - leynd af orkuverði aflétt

Lög um fiskveiðar verða endurskoðuð og aflaheimildir innkallaðar í áföngum. Í stjórnarsáttmálanum kemur einnig fram að ný ríkisstjórn ætlar að stuðla að gagnsæi í orkusölusamningum og leitað leiða til að aflétta leynd af orkuverði til erlendra stóriðju fyrirtækja. Þá verða Varnamálastofnun og loftrýmisgæsla við Ísland endurskoðuð. Stækka á friðland í Þjórsárverum, heimila handfæraveiðar yfir sumartímann og fækka ráðuneytunum í níu úr tólf.

100 daga áætlun - IceSave, persónukjör og stöðugleikasáttmáli

Fram kemur í tilkynningu frá forsætisráðueneytinu að ríkisstjórnin geri sér grein fyrir því að miklu skiptir að unnið sé hratt til að bregðast við þeim vanda sem við þjóðinni blasir. „Hún hefur því sett sér markmið sem hún ætlar að ná á næstu 100 dögum sem fela meðal annars í sér að afgreiða forsendur fjárlaga til millilangs tíma, hefja lokavinnu við Icesave - samningana, ná samningum við aðila vinnumarkaðarins um stöðugleikasáttmála, endurfjármagna bankana og semja við erlenda kröfuhafa þeirra, leggja fram frumvörp um stjórnlagaþing, þjóðaratkvæðagreiðslur og persónukjör, ráða nýja yfirstjórn í Seðlabanka Íslands, hefja mótun nýrrar atvinnustefnu og hefja endurskoðun fiskveiðistjórnunarkerfisins svo nokkur atriði séu nefnd."