Yfir 300 staðnir að hraðakstri á þriðjudagskvöld

Meira en 300 ökumenn voru staðnir að hraðakstri í Reykjavík síðastliðið þriðjudagskvöld en þremur ómerktum lögreglubifreiðum var komið fyrir á Kringlumýrarbraut, Miklubraut og Sæbraut. Fram kemur í tilkynningu frá lögreglunni að reynslan hafi sýnt að notkun ómerktra lögreglubifreiða gefi gagnlegar upplýsingar um ástand umferðarmála og auðveldi leit að lausnum þar sem þeirra er þörf.

Brot 52 ökumanna voru mynduð á Kringlumýrarbraut en fylgst var með ökutækjum sem var ekið í norðurátt, að Sigtúni. 31% ökumanna ók of hratt eða yfir afskiptahraða. Fjórtán óku á 80 km. hraða eða meira en sá sem hraðast ók mældist á 94. Hámarkshraði er 50 km.  

Lögregla myndaði brot 129 ökumanna á Miklubraut en fylgst var með ökutækjum sem var ekið í vesturátt, að Rauðarárstíg. Hámarkshraði er 60 km. Nítján óku á 80 km. hraða eða meira en sá sem hraðast ók mældist á 101.   

Þá voru brot 123 ökumanna mynduð á Sæbraut. Fylgst var með ökutækjum sem var ekið í norðurátt að Holtavegi. 36 óku á 80 km. hraða eða meira en sá sem hraðast ók mældist á 110. Hámarkshraði þarna er 60 km.

Mælingarnar á þriðjudagskvöld eru hluti af sérstöku umferðar- og hraðaeftirliti í umdæminu.