Einn bátur hefur hrefnuveiðar um helgina

Aðeins einn bátur byrjar hrefnuveiðar, þegar veiðarnar hefjast um eða upp úr helginni. Rúmlega 20 sóttu um veiðiheimildir, en sjávarútvegsráðuneytið hefur ekki enn afgreitt þær.

Útgerðir hrefnubátanna Drafnar, Njarðar og Halldórs Sigurðssonar, sem lengst hafa stundað veiðarnar hafa tekið fiskibátinn Jóhönnu ÁR á leigu og ætla útgerðarmennirnir að samnýta hana í hagræðingarskyni. Hugsanlega heldur svo einhver af fyrrnefndum bátum á veiðar, ef ekki veiðist nóg á Jóhönnu. Þessar útgerðir eru allar með veiðileyfi til fimm ára og þurfa því ekki að sækja um, eins og nýliðarnir, sem hafa áhuga á veiðunum.

Í vor var í fyrsta sinn auglýst eftir umsóknum til veiðanna, en síðan setti ráðuneytið þau skilyrði að viðkomandi umsækjandi hefði reynslu, sem hvalaskytta. Hætt er við að þau skilyrði fækki gildum umsóknum til muna.

Kvótinn er hundrað dýr og vonast veiðimennirnir til að geta selt hrefnukjöt til Japans.