Fá engar skaðabætur vegna sjónmengunar

Hjónin á Mýrum á Egilstöðum fá ekki skaðabætur af hálfu Landsvirkjunar vegna sjónmengunar samkvæmt Héraðsdómi Reykjavíkur. Dómarinn Símon Sigvaldsson skilaði hinsvegar inn séráliti þar sem hann sagðist ósammála meðdómurum sínum í hinum fjölskipaða dómi.

Tilurð málsins er sú að Landsvirkjun reisti raflínur á lóð þeirra hjóna árið 2000. Þau töldu sjónmengun stafa frá staurunum og að það rýrði eign þeirra um tæpar fimm milljónir króna.

Í niðurstöðu héraðsdóms segir að staurarnir séu í átta hundruð metra fjarlægð frá býli þeirra hjóna. Þá benda dómararnir á að staurarnir á landi þeirra hjóna séu í raun nær nágrönnum þeirra á næsta bæ heldur en bæjarins á Mýri.

Að auki segir í niðurlagi dómsins: „Þá standa engar lagaheimildir til þess að dæma bætur fyrir sjónræn áhrif. Með hliðsjón af þessu telur dómurinn að stefnendur hafi ekki sýnt fram á bótaskylda rýrnun á verðmæti landsins vegna þessa."

Landsvirkjun var því sýknuð af kröfunni og málskostnaður látinn niður falla.

Einn dómarinn, Símon, var ósammála meðdómendum sínum. Hann taldi það rétt að eignin rýrnaði í verði vegna rafstauranna.