Dæmdar 19 milljónir

„Þessi niðurstaða kemur okkur mjög á óvart. Við bjuggumst við því að málinu yrði vísað frá, þar sem við teljum manninn hafa orðið uppvísan að mjög vafasömum starfsháttum og gerst brotlegur við lög í starfi sínu fyrir félagið,“ segir Sigurður Grétar Ólafsson, formaður stjórnar Byggingafélags námsmanna. Félagið var á miðvikudag dæmt í Héraðsdómi Reykjavíkur til að greiða fyrrverandi framkvæmdastjóra laun í eitt ár. Sú upphæð, með orlofi, bílahlunnindum og mótframlagi í lífeyrissjóð, er rúmar nítján milljónir króna. Við það bætast dráttarvextir.

Forsaga málsins er sú að fyrrverandi framkvæmdastjóranum, Friðriki Guðmundssyni, var vikið tímabundið úr starfi í desember 2007 í kjölfar innri endurskoðunar á rekstri félagsins. Í febrúar árið eftir var ráðningarsamningi við Friðrik rift af stjórn félagsins, sem tilgreindi að alvarlegar athugasemdir hefðu komið í ljós við yfirferð á bókhaldi, samningsgögnum og tengdum gjörningum. Vegna alvarlegra og vítaverðra brota í starfi taldi félagið sig ekki skuldbundið til þess að greiða Sigurði frekari laun eða tengd gjöld.

Starfssamningur Sigurðar frá 1. október 2006 kveður á um að hann skyldi halda fullum launum og hlunnindum í tólf mánuði eftir starfslok, skyldi koma til uppsagnar af hálfu Byggingafélags námsmanna. Hann höfðaði því mál og krafðist auk þess skaðabóta, þar sem hann taldi málatilbúnað félagsins gjörsamlega haldlausan. Byggingafélagið krafðist lögreglurannsóknar á málum fyrri stjórnar. Efnahagsbrotadeild ríkislögreglustjóra hóf rannsókn í apríl í fyrra.

Sigurður Grétar segir rannsókn efnahagsbrotadeildarinnar vera í fullum gangi. Stjórn Byggingafélagsins heyri í starfsmönnum deildarinnar reglulega og bíði eftir niðurstöðum hennar. Hann gerir ráð fyrir að dómnum sem féll á miðvikudag verði áfrýjað. Fyrst þurfi þó að bera málið fyrir stjórnina og fara yfir það með lögmönnum félagsins.

kjartan@frettabladid.is