Telur hægt að ná hagstæðum lánasamningum við Norðurlönd

Steingrímur J. Sigfússon, fjármálaráðherra, er vongóður um að Íslendingar nái hagstæðum samningi við Norðurlönd vegna lánveitingar þeirra til Íslands. Lán Alþjóðagjaldeyrissjóðsins kostar Íslendinga rúma 3 milljarða króna á ári.

Norðurlöndin hafa skuldbundið sig til að lána Íslendingum 2,5 milljarða dollara eða rúmlega 300 milljarða króna í tengslum við lánveitingar AGS.

Lánin renna beint inn í gjaldeyrivaraforða Seðlabankans en ekki stendur til að nota þau nema að litlu leyti. Á meðan eiga peningarnir að liggja inni á reikningi og safna vöxtum.

Vextir af lánunum eru hins vegar mun hærri en þeir innlánsvextir sem eru í boði. Íslendingar greiða þannig 8,5 milljónir króna á dag fyrir lán AGS vegna vaxtamunar. Í því tilfelli eru innlánsvextir 1 prósent en lánsvextir 4 prósent.

Ríkissjóður greiðir því rúma 3 milljarða króna á þessu ári í vaxtamun. Ríkisstjórnin hefur ekki útilokað að reynt verði að semja um vaxtakjör á láninu upp á nýtt. Fjármálaráðherra fundaði með sænskum stjórnvöldum í vikunni vegna lánveitingar Svía til Íslands. Hann er vongóður um að hægt verði að ná hagstæðum samningi.

„Það er alveg ljóst að lánaskilmálar og lánskjör skipta okkur miklu máli í þessum efnum. Sem betur fer hafa vextir og vaxtaálag farið lækkandi alls staðar og það leggst með okkur núna. Ég er þokkalega bjartsýnn á það að lánskjör í þessum efnum verði okkur hagstæð miðað við það sem í boði gæti verið," sagði Steingrímur.