Meintur smyglari tapar skaðabótamáli

Ríkið var sýknað af fimmtán milljón króna skaðabótakröfu Rúnars Þórs Róbertssonar sem hann krafðist eftir að hann sætti gæsluvarðhaldi grunaður um stórfelldan innflutning á kókaíni árið 2007. Hann var sýknaður af glæpnum.

Það var svo um miðjan apríl síðastliðinn sem Rúnar var aftur handtekinn, nú grunaður um að hafa smyglað yfir 100 kílóum af fíkniefnum í svokölluðu Papeyjarsmygli. Hann ásamt fimm öðrum sitja í gæsluvarðhaldi vegna málsins.

Forsaga málsins er sú að Rúnar Þór og Jónas Árni Lúðvíksson sem hefur einnig verið handtekinn í tengslum við Papeyjarsmyglið voru ákærðir fyrir stórfelldan innflutning á kókaíni árið 2007. Um var að ræða tæp 4 kg af kókaíni sem var falið í Mercedes Benz Sprinter bifreið sem var flutt til landsins frá Þýskalandi.

Þetta var mesta magn kókaíns sem lagt hafði verið hald á í einu. Rúnar Þór var ákærður fyrir að hafa skipulagt innflutning efnisins og Jónas Árni fyrir að fjarlægja pakkningar með gerviefni, sem lögreglan hafði komið fyrir í stað kókaínsins, úr bílnum. Mennirnir neituðu báðir sök og voru sýknaðir

Rúnar fór í skaðabótamál gegn ríkinu fyrir að hafa haldið sér saklausum í gæsluvarðhaldi. Nú hefur ríkið verið sýknað af kröfu Rúnars en uppkvaðning var nú í morgun.

Aðspurður sagðist lögfræðingur Rúnars telja líklegra að málinu yrði áfrýjað til Hæstaréttar.