Borgarstjórn samþykkir tillögu Ólafs Magnússonar

Borgarstjórn Reykjavíkur samþykkti á þriðjudag að vísa til borgarráðs og stjórnar Orkuveitu Reykjavíkur tillögu Ólafs F. Magnússonar borgarfulltrúa um bann við sölu á eignum borgarinnar í orkufyrirtækjum .

Í fréttatilkynningu frá Ólafi segir hann að meirihlutaflokkarnir hafi í fyrstu einungis ætlað að vísa tillögunni til stjórnar OR. Ólafur segist hins vegar hafa lagst gen því þar sem hann leggi áherslu á forræði Reykjavíkurborgar og Reykvíkinga yfir Orkuveitu Reykjavíkur.

„Undir þessi sjónarmið tók Sigrún Elsa Smáradóttir, borgarfulltrúi samfylkingar og stjórnarmaður í Orkuveitu Reykjavíkur. Við svo búið breyttu borgarfulltrúar meirihlutans í borgarstjórn málsmeðferðartillögu sinni og féllust á röksemdir Ólafs F. og Sigrúnar Elsu í málinu. Því var lagt til að tillögunni yrði einnig vísað til borgarráðs og var það samþykkt einróma með öllum greiddum atkvæðum," segir Ólafur.

Ólafur lét því bóka að hann fagnaði þeirri víðtæku samstöðu sem náðst hafði um tillögu sína um eignarhald almennings í orkufyrirtækjum. „Vonandi leiðir það til þess að Orkuveita Reykjavíkur verði aldrei einkavædd, heldur njóti almenningur um langa framtíð þeirrar auðlindar sem felst í jarðhita á höfuðborgarsvæðinu," sagði Ólafur í bókun sinni.